2Ti 1 | PMA | STEP | Inau Pol namutis leta ekek. Inau navi eiloheh tai onen Iesu Kristo usil hatkatien onen Ahi ten mututien. Ka kei sila inau mahitehiten moulien hau koa ka ven Iesu Kristo.

2 Timothy 1

1 Inau Pol namutis leta ekek. Inau navi eiloheh tai onen Iesu Kristo usil hatkatien onen Ahi ten mututien. Ka kei sila inau mahitehiten moulien hau koa ka ven Iesu Kristo.

2 Namutis minuk Timoti, koa kosuval more natkuli. Navisi keke envatien, enmahisien, ka tomat onen Ahi Tamer ka Asuv orer, Iesu Kristo, hel en moulien onom.

Pol Sel Kat Timoti en Umen koa Ahi Sani Mini Keke Hehuli Kati Hekeih

3 Timoti, en vongien ka en meneai, ekrovobongentei keik en hisien keil onak, namul namasmas Ahi venuk. Ahi koanik, namusil kati suval avu onak keil telamu amumoni, ka nakilea namusil kati en sise koa mal. 4 Namundem kat si metom koa motmot navong lorasil, ka ekvati malesuk eris vasakinau mahilelau en sien. 5 Namundem kat more demkatien onom koa vi anatin. Demkatien enek suval more demkatien onen avu onom Loes ka mama onom Iunis. Ka nakilea mul enuk emun. 6 Ven tounah enek, nasel katuk kiles kum hetal min sanien koa Ahi sani minuk navong naling hek enuk, kiles kilihlihi hekeih hesuval vi ahang keke hean hemai hemariso. 7 Kum hekeih veni Ninin Votut koa Ahi sani min ialu rosakintei ialu lovametau. !Vuo! Ninin onen mul sakin ialu lovoum vatal min keihoen onen, eraluhehat meatin sav, ka lokilea lovalei kat revi sakien keil oralu.

8 Sakini, konamemoutei kovahitehiten selusien usil Iesu, asuv orer. Ka konamemoutei enau mun koa namul en eim takeih ven navi meatin onen Iesu. !Vuo! Hetal min keihoen koa Ahi hesani minuk, kusil sise ten mahien suval inau ven more longlongien usil Iesu. 9 Ahi kulatir ran tisaen ka san moulien hau minir. Kei vise latir rovahi meatin keil onen. Rovitei ven tounah koa romumoni. !Vuo! Kei mumoni mukonek musil rendemien onen ka ven more envatien onen enir. Mulamu en avong Ahi mumon out netan, kei vat kati keke hesan Iesu hemai hehi sise keke hesakin more envatien onen hekistal enir. 10 Ka kosa, mai vi anatin ka kistal minir navong Iesu Kristo, koa mututir, mita en out netan. Kei mu tan en keihoen ten matien, ka more longlongien usili rie lat sise ten moulien hau minir.

11 Ka ven Ahi envati keke more longlongien koanek heka vasi out, kei rie latnau navi eiloheh onen, navitehiteni min meatin vasi keil, ka navisein keil eni. 12 Ka ven koanek, namul nakur mahien en eim takeih enek. Ka kovaseini namul en eim takeih, narmundemkotei ven nakilea revi isei koa naling desien onak mul ien. Ka nakilea mok keke kei kur keihoen vinvin vakur koe asa koa kei lingi en hek numoni hetokol Avong Ekor. 13 Keik emun kihuli kat selusien ten anatinien koa naviseinuk eni tuai. Sakien keil koa koles nau namumoni ka asa koa kolonge nau naviteni, keik emun kumoni. Ka kihuli kat sakien ten demkatien ka envatien suval koakeil amusil kat Iesu Kristo. 14 Kilosil kat revi umen koa Ahi lingi mul en hem, kilei kati hetal min keihoen onen Ninin Votut koa mul enir.

15 Keik kolong kilea tuai keke tuak vasi keil en provins ten out Esia, suval Fukelas ka Hemongenes, keil vasi arasil ranau. 16 Onesiforas, kei sasen mul mai venau en hati avong enek, ka mul vou lat rendemien onak. Ahi hesan enmahisien mini ka min koakeil en teim sen ven kei romemoutei vasao enau en eim takeih koanik. 17 Anatin, navong rokol mari meteimal ten out Rom, kei mul lekatnau va vio ... votin out koa naro ien. 18 Ka navong emun koa namum en out Efeses, kokilea keke kei kataunau houlu. Sakini, navis Asuv Iesu enhemahisi navong hesan hakot en meatin keil en Avong Ekor.